cinta mah moal lapur ku umur

Hanas diri bungah ati
nganti  jangji pasinina
harianeun pasini pegat di jalan,…duh geuning
balukarna tina asih malih warni jadi peurih
Impian biheung kasorang,…jungjunan
hariring ati nu kingkin….

Hanas diri dinyari-nyari
nganti panggih kapaut ati
harianeun anjeun, Jungjunan, meuntas leupas…
Duh geuning asih mah pinuh rusiah
mipit wiati ku hate nu lungse, Gusti
bagjakeun jungjunan ati

Goong  téh kaimpi  totos
duka naon balukarna
kajeun teu wawuh jeung dulur
kajeun anggang jeung baraya
tinimbang heunteu laksana
diri abdi jeung anjeunna,….geuning
badan iklas bibilasan….

Bagja kacipta, kasura tunggara
Duka naon rusiahna
Sawang kamelang malang kahayang
Nurih hariring kapeurih unggal peuting
Meusmeus ngejat meupeus munajat
Ngalanglayung satungtung can tipung
Naha atuh bet ngarasa laér
Asih mah moal lapur ku umur,
moal kungsi angkeub ku wanci

BONGAN KITU

Bongan kitu disebutna, puguh mega

dipapay di awang-awang: cek aing angin
bongan kitu karasana, nyerina raheut

tatamba ka saban tabib: cek aing ngimpi
bongan kitu digambarna, geulis kabina-bina

ditepungan unggal wayah: cek aing werejit
bongan kitu pandena, nyarita sorangan

ditataan di rs jiwa: cek aing eling
bongan kitu ayana, beda jeung nu lian

diguliksek dina kamus: cek aing ibadah
bongan kitu itunganana: Gusti